Mentri Giuseppi rripusava

cu Maria e u Bbamminu
un’ancilu cci cunsigghiava
di mettisi prestu ‘ncaminu

pi sabbari u nnuccenti
e subbitu in eggittu scappari
luntanu di l’amici e parenti
finu a quannu putiri rriturnari

e cu pacenzia e tantu amuri
cu lu nutricu e cu Maria
ascutò l’ancilu ru Signuri
e s’incaminò pi la via.

Giuseppi bravu fallignami
si metti prestu a travagghiari
pi cummattiri la fami
e la famigghia aiutari.

Sposu onestu e primurusu
uomu Santu tuttu amuri
fusti sceltu na lu munnu
comu patri ru Signuri

la to vucca mai parrò
mai riscussi mai lamenti
in silenziu l’adurasti
cu lu cori e cu la menti. 

Franco Catalano