E spaddi ri st'antica
cattedrali
e pieri ri stu ranni
rruccieri
stinnutu Supra 'na
scugghera
tu trovi st'anticu
quartieri
E' abbitatu di ggenti
semplici
pronta sempri a ddari
'na manu
ggenti gginirusa
di cuori ranni
cu l'amici e canuscenti
vicinu e luntanu
La jurnata cca' scurri
lenta
accumpagnata di l'unna
di lu mari
china di vuci ri tanti
nnuccenti
ca na' srata stannu
a ggh'jucari.
La menti mi cunnuci
no passatu
e mmi rritrovu nicu
a ggh'jucari
e ciampi o sbigliu
o bbattuni
cu tanti amici ca
nun pozzu scurdari.
E s'affudda la menti
di pinzera
di ggenti ca campava
cu sururi
di ggenti ca nun
cc'e' cchiu'
e s'affliggi lu me cori
di duluri
e ggirannu a dritta
e a manca
a nuddu viru assittata
a puntiari
e prestu si stanchinu
l'ucchiuzzi me
ggirannu sempri a forza
di circari.
Ora ca fami e malura
nun cci nne' cchiu'
finuta e' dda
nicissitati
nun cc'e' cchiu' rraggiuni
d'arripizzari
picchi l'ebbichi oramai
su canciati.
I nichi ora juochinu cu
telefoninu
i granni sunnu sempri
'nchiffarati
e i gabbiani svulazzinu
cuntenti
mentri la paci rregna
srati srati.
Franco Catalano
