Comu l'acqua na li manu

lu tempu scurri e si nni va'
purtannusi tutti i rricordi
ri chiddu ca nun viri cchiu'
ma lu to rricordu Santu Patri
guverna cori e mmenti ri nuatri.
E semu tutti cca presenti
granni e nichi comu sempri
cu canti ddittati di lu cori
pi putiri e vuliri fistiggiari
cu l'animu filici e rrilassatu
l'amuri tio' ri Patri scunfinatu.
Carrichi di tanti suffirenzi
stanchi di tutti li fatichi
a tia n'affiramu Patri Santu
pi rritruvari paci e rristoru
p'essiri prutetti e pirdunati
na li periculi e di li piccati.
E sta ggenti e stu rriuni
p'amuri e rricunuscenza
a tia canta cuntenti
cu ffiri e ddivuzzioni
pi lu periculu scampatu
donu ru to cori nnamuratu.
E tu filici e assai cuntenti
'mmenzu a chisti ggenti
cu lu focu ru to amuri
sazzii la siti d'ogni cori
e nn'illumini la srata
pi la patria bbiata.
Gloria e Onuri o Patri
o Figghiu e o Spiritu Santu
cu la menti lu corpu e l'anima
e cu lu nosru cantu.

Franco Catalano