MATRI NATURA
SI RRIBELLA

Comu 'na matri amurusa
sugnu sempri cca prisenti
e ccu pacenzia rrispittusa
sfamu tutti quanti i ggenti
suppurtannu cu amuri
ogni viulenza e ogni duluri
tanti seculi su gia' passati
ca cririti d'essiri patruna
quantu vileni siminati
no munnu comu latruna
senza aviri nuddu rrispettu
pi cu vi nutri cu affettu
troppi su' li muccuna amari
c'haju mannatu 'mpanza
avvilinati su' terra e mmari
senza futuru senza spiranza
pi curpa di vuatri priputenti
senza futuru su li nnuccenti.
Ora stanca e ammaraggiata
nun pozzu cchiu' suppurtari
troppu sugnu addulurata
e ggh'junta e' l'ura di pavari
pi lu vosru mali rricivutu
'ncanciu di l'amuri avutu.

Tremu comu 'na pampina
sbattuta d'un forti ventu
e ru munti a la marina
jo' siminu morti e scantu
spirannu di farivi canciari
u vosru modu ri campari.
Acqua e nnivi di lu celu
focu ru centru di la terra
cavuru friddu e tantu ggelu
comu fussi 'na granni vierra
pi farivi rritruvari li valura
ca perdiri vi fici la primura.

La fini certu nun'e' luntana
nun cc'e' tempu ri pinzari
e pi curpa ra menti umana
jo' ammiscu pi rricuminciari
certa ca nna vuota arripusatu
stu munnu rripigghia ciatu.

FRANCO CATALANO