Matri Santa Mmaculata

ri piccati preservata
tu ca fusti suoru e matri
pi vulunta' ru S. Patri
di lu figghiu tantu amatu
di l'Arcancilu annunziatu
e cu firi e tantu amuri
purtasti 'nsenu lu Signuri
pa sarvizza ri tutti quanti
piccatura e cririenti.
Intercedi pu munnu sanu
e pu cuori di l'umanu
chinu d'odiu e rrancuri
ca scanusciri fa l'amuri
picchi amanti ru putiri
e frati e suoru fa muriri
pi stu mali trasparenti
ca fa sraggi ri nnuccenti.
Cu lu fuocu ru to cuori
preja sempri lu Signuri
preja u Patri a ogni ura
pi sti figghi piccatura
junti puoi a lu scurari
tu da suli u nni lassari
porta tutti a casa amata
o MARIA MMACULATA
pi Osannari u Rredenturi
e Ddiu Patri tuttu amuri.

Franco Catalano