Pi littinu ‘na manciatura
pi cuperta sulu pagghia
e cu tutti li pastura
ti facisti ‘na famigghia
a la luci r’un fuchiddu
Maria la Matri so Ddivina
cu lu voi e l’asineddu
l’allatava nà pitturina.
Patri Santu Onniputenti
chi rrialu nni facisti
pi sabbari tutti i ggenti
na ‘na stadda tu nascisti.
Tri rre cu granni amuri
cririennu ‘n’antica profezzia
jeru a la rricerca ru Signuri
seguennu ‘na stidda cu la scia
ca visioni r’un miraggiu
accavaddu a tri cammelli
affruntaru lu viaggiu
attraversu muntagni e valli
sti rre maggi orientali
vinniru ‘mpaci senza vierra
e ‘nziemi a li scorti rreali
purtaru uoru ‘ncenzu e mirra.
Franco Catalano
